"Онкопатруль" проектына йомгак ясалды

Билгеле булуынча, проект 2019 елның 2 февралендә Бөтендөнья яман шешкә каршы көрәш көннәрендә эшли башлады. Аңлашылуынча, ул яман шеш авыруларын профилактикалауга, сәламәт яшәү үрнәген формалаштыруга юнәлтелгән.  Акциянең үзенчәлеге шунда ки, Милли радиология  медицина тикшеренү үзәге белгечләре төбәк онкодиспансерлар табиблары белән берлектә эре предприятиеләрдә һәм оешмаларда ир-егетләр һәм хатын-кызлар сәламәтлеге скринингы үткәрә. 6 ел эчендә 13 мең кеше тикшерелгән, шуларның 7 меңе яңа тикшерүгә юнәлтелгән.

Башкортстан - 2019 елда проектка кушылган беренче төбәк. Ул вакытта "Башкорт сода компаниясе"нең һәм "Салаватпыяла" предприятиесенең 500-дән артык хезмәтчәне яман шеш авыруларын иртә ачыклау диагностикасын үткән. 2025 елда акциягә "ОДК-УМПО" заводы кушылган.

Радий Хәбиров үзенең чыгышында Башкортстанда яман шеш авыруларына каршы көрәш мәсьәләсенә җитди игътибар бүленүен билгеләде. Әйтүенчә, онкология хезмәтен үстерүгә һәм модернизацияләүгә ел саен күп акча бүленә. "Онкоавыруларга каршы көрәш" федераль проекты чикләрендә 400 берәмлектән артык корылма сатып алынган. Поликлиника белән онкодиспансерның яңа хирургия корпусы төзелгән, Республика балалар онкологиясе һәм гемотологиясе үзәге ачылган. Онкологик кисәтү үзәге эшли. Комплекслы эш нәтиҗәлелегендә республикада яман шештән үлүчеләр саны кими. 2020 елда бу күрсәткеч  100 мең кешегә 169,6 булса, былтыр 156,8 булган. 

Русия сәламәтлек саклау министрлыгының баш онкологы, Русия онкологлар ассоциациясе президенты, Милли радиология  медицина тикшеренүләре үзәгенең генераль директоры, профессор, академик Андрей Каприн төбәктә чараларның югары дәрәҗәдә оештырылуы һәм онкология хезмәтенең динамик үсеше өчен Башкортстан җитәкчелегенә рәхмәт белдерде. 

***

Сәламәтлек саклау министры Айрат Рәхмәтуллин "Онкопатруль"нең тәү чиратта республикада яшәүчеләрнең гомерләрен  саклап калуга юнәлтелүен билгеләде. Проект шулай ук белгечләргә яман шешкә каршы көрәш өлкәсендә заманча казанышлар белән танышу, онкология хезмәтен оештыру өлкәсендә төп  мәсьәләләр буенча фикер алышу мөмкинлеген бирә. Айрат Рәхмәтуллин белдерүенчә, 2025 елда республиканың 600 кешесе тикшеренү үткән.  Яман шешкә 94 очрак ачыкланган. Иртә диагностика аркасында кеше гомерләре коткарылган. Профилактика зур әһәмияткә ия.

***

"Онкопатруль"проектының Башкортстан предприятиеләрендә гамәлгә ашырылуына аерым игътибар бүленде. Сәнәгать компанияләре вәкилләре яман шеш авыруларын профилактикалау буенча агарту чараларын оештыру тәҗрибәсе белән бүлеште.

"Гражданнар  диалогы"ында катнашучылар шулай ук ил вузларында онколог-белгечләрне әзерләү, "Онкопатруль" проекты үсеше буенча башка төбәкләр тәҗрибәләрен тикшерде. 

Видеоэлемтә режимында сөйләшүгә республика шәһәрләре һәм районнары җитәкчеләре кушылды.  Алар муниципалитетларны "Сәламәтлек поездлары" эше чикләрендә   "Онкопатруль" программасына кертергә тәкъдим итте.