Авыручылар саны арта...

Көзгә керү белән төрле вируслы инфекцияләр баш калкыта башлый инде. Халык күп булган урыннарда чир аеруча тиз тарала.

   “Соңгы көннәрдә Башкортстанда кискен респиратор инфекцияләр (ОРИ) белән авыручылар саны арта бара”,- дип хәбәр итәләр Роспотребнадзорның республика идарәсендә. Алар белдерүенчә, соңгы атнада гына 20 368 кеше ОРИ белән чирләгән, шуларның 9774е – ундүрт яшькә җитмәгән балалар. Алдагы атна белән чагыштырганда, чирләүчеләр саны 44,4 процентка (!) арткан.

   “Көз ахыры-кыш башында гриппның баш калкытуы мөмкин”,- дип кисәтә табиблар. Ә аннан саклану өчен бүген нәтиҗәле вакциналар җитештерелә, республикага алар 505 540 доза кайтарылган да инде. Шуларның 246890ы – өлкәннәр, 258 650се балалар өчен тәгаенләнгән. 10 сентябрьгә кадәр медиклар 389573 кешегә прививка ясарга өлгергән.

   “Балада чирләү билгеләре сизелү белән аны өйдә калдырыгыз һәм табиб чакырыгыз”,- дип киңәш итә белгечләр.

Фото: bashinform.ru