Таҗикстан табиблары Шәүкәт белән Шөһрәт бәхетләрен хезмәттән тапкан

Шәүкәт Култаев, Таҗикстаннан уролог, үзенең һөнәри бәхетен Башкортстанда тапкан. Ул Благовар районы Языково район үзәк хастаханәсендә эшли. Аның медицинага юлы кешеләргә ярдәм итү балачак хыялыннан башланган. Балачак хыялы аны  Дүшәнбе медицина вузына алып килә. Берничә ел Таҗикстанда эшләгәч, Шәүкәт, биредә эшләп яшәгән туганнары сөйләгәннәрдән илһамланып,  Башкортстанга күченергә карар  кыла.

“Минем монда туган тиешле абыем һәм энем яшиләр. Аларның биредәге киң һөнәри мөмкинлекләр турындагы уңай тәэссоратлары минем Башкортстанга күченүемдә мөһим роль уйнады”, – дип сөйли Шәүкәт.

Әйткәндәй, Шәүкәтнең энесе Шөһрәт Култаев та Языково үзәк район хастаханәсендә эшли. Ул – оториноларинголог. Шөһрәт Башкортстанга элегрәк, 2021 елда БДМУның ординатурасын тәмамлаганнан соң  күченгән. Аның тәҗрибәсе Шәүкәт өчен күченергә өстәмә стимул булып торган.

Бүгенге көндә Шәүкәт – уролог-хирург ассистенты һәм ул төрле катлаулылыктагы операцияләрдә катнаша. Табиб сүзләренчә, аның өчен һәр авыруга игътибар бүлү һәм үз күнекмәләрен даими рәвештә камилләштерү мөһим.

“Мин урологияне аңлы рәвештә сайладым. Бу юнәлеш минем өчен кызыклы, һәм мин хезмәтемнең кешеләр сәламәтлеген саклап калуын күрәм. Көн саен без операцияләр ясыйбыз, бу миңа бик кадерле практика бирә”, – дип уртаклаша ул эше турында.

Шәүкәт Култаев берничә елдан мөстәкыйль табиб-уролог булырга, ә киләчәктә Уфаның 21нче шәһәр клиник хастаханәсенә эшкә күчәргә ниятли.

"Миңа Башкортстанда бик ошый. Монда мин үземне өйдәге кебек хис итәм, үсеш һәм камилләшү өчен мөмкинлекләр күрәм. Республика мине колач җәеп  каршы алды, һәм мин аның медицина өлкәсенә үз өлешемне кертергә телим", – ди Култаев.

Чыганак: bashinform.ru