Арка мие ялкынсынуын ничек җиңәргә?

Бүгенге көндә арка мие ялкынсыну – иң күп таралган авыруларның берсе.

   Ул – умыртка авыруларының бер төре. Авыртуларның сәбәбе – арка миеннән умырткалыкка чыгучы җепселләрнең ялкынсынуы. Арка мие ялкынсынуы вакытында бил генә түгел, бөтен арка авыртырга мөмкин.

Сораштырулардан күренүенчә, әлеге авырудан Русия халкының 35 проценты интегә. Ә чынлыкта исә алар саны тагын да күбрәк, чөни кешеләр, ахыр чиккә җитмичә торып, табибларга ярдәм сорап мөрәҗәгать итми. Алар муендагы, аркадагы, калак сөяге астындагы авыртуларга, сызлауларга түзә, узар әле дип өметләнә..

   Әмма... авырту узмый, алай гына да түгел, дәваланмаган умыртка авырулары икенче бер төрле авырулар форматында да күренә башлый. Аннан табиблар да авыру кешегә диагноз куя алмый аптырашка кала.

   Умыртка авырулары теләсә кемгә “Һөҗүм итәргә” мөмкин. Бигрәк тә туган-тумачасының берәрсендә әлеге чир булса: чөнки аның белән авыру мөмкинлеге нәселдән күчә. Өшү-туңу, нерв киеренкелеге бу чирне йокыдан уятып җибәрергә сәбәпче була.

   Умыртка авырулары күптөрле була: кискен, ток белән бәргәндәй кисеп авырту күзәтелергә, яки авырту эчке әгъзаларда үзен сиздерергә, я булмаса, авырту шулкадәр көчле булып, кеше урыныннан да кузгала алмаслык хәлдә булырга мөмкин.

   Эш шунда, арка мие ялкынсынуы вакытында умырткадагы дисклар кысыла, чатный һәм амортизация функциясен үти алмый башлый. Умырткалык читләре җыерыла һәм болар арка мие җепселләрен кыса.

Бил умыртка авыруларыннан (арка мие ялкынсыну) башка, әле тагын муен, күкрәк остеохондрозы да була.

   Хәзерге көндә сатуда бик тиз генә савыктыруны вәгъдә итүче чит ил кремнары һәм мазьлары күп. Кагыйдә буларак, алар, беренчедән кыйммәт, ә икенчедән, күп очракта хәтта авыртуны да баса алмыйлар. Ә инде авыруны дәвалый алулары турында сүз дә юк...

   Халык медицинасында исә шакты яхшы нәтиҗәләр бирә торган чаралар бар дип әйтергә була. Мәсәлән:

• Кара торманы әрчемичә угычтан уарга (шулай ук керән тамыры да шифалы). Суын сыгарга да, торма вагын киҗемамык чүпрәккә төреп, авырткан урынга куярга. Өстеннән пленка белән ябып, йон шарф яки шәл белән кысып бәйләп куярга. Яндыра башлагач, алырга.
• Авырткан урынга нәзек катлам итеп бал сөртергә дә 2 кат кәгазь тастымал белән капларга. Өстенә ике горчичник куярга да, пленка белән ябарга, аннан шәл яки шарф белән бәйләргә. Дәвалау массасын 1,5 сәгатьтән озак тотмаска кирәк.
• Яшел әрекмән яфрагын юып, аскы ягы белән авырткан җиргә ябарга һәм пластырь белән ныгытып, шәл ябарга. Төн буена тотарга.
• Яшел каен яфрагына кайнап чыккан су коярга да, калын катлам итеп авырткан җиргә ябарга. Һәм пленка белән каплап, шәл белән бәйләргә.
• Шулай ук алабута яки усак яфрагын шулай итеп файдалану да җиңеллек бирәчәк.
• Әче борычны үсемлек мае белән кушып (1:2), авырткан җиргә ышкырга.
• Артыш белән дәвалау: 200 г. артыш ылысына 1 литр кайнар су салып, 30 минут тотарга һәм сөзеп, ванна суына кушарга. Аннан ваннада 20-30 минут утырырга.
• 1 аш кашыгы киптереп вакланган нарат җиләгенә (брусника) 1 стакан су кайнатып салырга, 20-30 минут төнәтеп сөзәргә. Көнгә 3 тапкыр 1-2шәр аш кашыгы эчәргә.
• Тагын да бер искиткеч файдалы халык медицинасы рецепты турында киләсе санда укырсыз.
• (Дәвамы “Сихәт”нең алдагы санында).

Фото: doctordlin.ru