Үкчәгә сөял үссә...

   Сорау:

    Кадерле редакция! Ике ел инде аягыма авырлык белән басам, чөнки үкчәмә сөял үскән. Нинди генә мазьлар сылап карамадым, файдасы тими.

   Бәлки, халык медицинасында нәтиҗәле чаралар бардыр. Берничәсе турында язып чыгыгыз әле, зинһар.

 Җавап:

   Озак җәяү йөргәндә, уңайсыз аяк киеме кигәндә табан астында, үкчәдә сөялләр барлыкка килә һәм кешегә бик күп җәфалар китерә. Әлбәттә, бүген аны медицина аппаратлары ярдәмендә “онтау” да мөмкин, ләкин башта халык медицинасы рецептларын кулланып карау дөресрәк булыр. Бүген тәкъдим итәчәк рецепт ярдәмендә сөялдән котылу өчен ике тәүлек кенә вакыт кирәгәчәк. Ул күп кешегә килешә.

   Дәваланыр алдыннан башта аякларны кайнар суда тотып, тирене йомшартырга кирәк. Ә дәвалану ысулы болай:

1. Җебетелгән сөял өстенә салидол пластыре ябыштырып куегыз. Бу эшне инструкциядә язылган төгәллек белән башкарыгыз. 1-2 көннән сөял урынында кечкенә генә тишек барлыкка килсә, бу инде пластырь сөялнең тамырын суырып алган дигән сүз. Кызганыч, бер-ике айдан шул ук урында яңа сөял барлыкка килергә мөмкин. Анысын да шул ысул белән дәваларга кирәк булыр.
2. Кайнар суда тотып йомшарган сөял өстенә төнгә йомшагы белән бергә лимонның яртысын бәйләп яталар. Моны 3 төн рәттән эшләргә кирәк. Сөял йомшарачак һәм авырту да узачак.
3. Лимон урынына төелгән аспирин да бәйлиләр. Ул да сөялне йомшарта.
4. Мунча кергәннән соң, содалы су белән йомшарткач, пемза белән ышкып табаннарны, үкчәләрне чистарталар. Төнгә каршы махсус сөялгә каршы крем яки бальзам сөртеп бәйлиләр.

   Игътибар!  Аяк киеменең уңайсыз, тар булуы, гел биек үкчәдә йөрү, аяк киеме табанының артык каты булуы да сөял чыгуга китерә. Шуңа да һәрчак уңайлы аяк киеме кию һәм аякларны тәрбияләп тору сезне бу уңайсызлыктан коткарыр.

Фото: orimos.ru