Тартып алыргамы, карап торыргамы?

Якынлаша! Уңнан, сулдан, эштән, мәктәптән, түгәрәктән, балалар бакчасыннан кәнфит тулы капчыклар кайта торган көннәр якынлаша!

Һәм ата-аналар алдында җитди сорау туа: нишләргә? Кәнфит тулы капчыкны бала кулыннан тартып алсаң да килешми... Калдырсаң да дөрес түгел. Чөнки һәр әзер “Кыш бабай бүләгендә”  1 кгга якын төрле кыяфәттәге ялтыравыклы тышлы кәнфитләр, мармеладлар, шоколадлар, чупслар, сагызлар тутырыла. Ә аларның яртысы “химия” икәнен син аңлыйсың.

Яңа ел бәйрәмнәре һәм аңа кушылып килгән каникуллар тоташ тәм-том ашауга әйләнеп, бала сәламәтлегенә зыян китермәсен өчен түбәндәге киңәшләрне исәпкә алырга тәккъдим итәбез.

• Булдыра алган кадәр бала кулына тоттырганчы ук күчтәнәчләрне киметегез. Очсызлы кәнфит урынына очсызлы уенчык салсаң да зыяны азрак булыр.
• Кәнфитләрнең срогын карап чыгыгыз. Бала белән кайсын алданрак ашарга кирәклеген ачыклагыз.
• Шәхси “капчык”тагы тәмлекәчләр белән бүлешүен сорагыз. Бу баладан тартып алу түгел! Беренчедән, бүлешүдән ул да канәгатьлек алачак. Икенчедән, ашашучылар күбрәк булган саен баланың сәламәтлегенә зыян азрак була.
• Туклыклы итеп ашаганнан соң гына кәнфитләргә чират җитәргә тиеш.
• Баллы-татлы ашаганда мөмкин кадәр күбрәк су эчәргә кирәк.
• Саф һавада йөрү дә мөмкин булганча ешаерга тиеш.
• Фото: mavink.com