Барлык яңалыклар
Сәламәтлек
14 гыйнвар , 15:00

Бозлавык корбаны булмыйм дисәң...

Түбәндәге киңәшләргә колак салыгыз әле.

Бозлавык корбаны булмыйм дисәң...

Табигать безне тотрыксыз һава торышы белән шаккаттырып кына тора: я күпләп кар явып китә, я бозлавык булып, тагын да бераздан аяк асты юешләнә.

      "Кышкы" статистика буенча, кардан һәм боздан чистартылмаган юллар, тротуарлар төрле имгәнүләргә китерә: урамда бозлавыкка эләгеп, егылып, җәрәһәтләр алу саны кышкы вакытта җәй белән чагыштырганда 2-3 тапкыр артыграк. Травмпунктларга күпләп мөрәҗәгать итүләр дә нәкъ  бозлавык вакытында теркәлә.

  Бигрәк тә өлкән яшьтәге кешеләр таеп егылып, аяк-куллары сынуга дучар була, чөнки өлкәнәя килә кешенең скелеты да үзгәрә, “йомшара”.  Хәтта кечкенә генә бәрелү дә  аяк-куллар, кабыргалар, умыртка, янбаш сөяге сыну белән тәмамланырга мөмкин. Бу сынуларның 95% очрагы хатын-кызларда күзәтелә.

  • Кышын имгәнүләрне профилактикалауның төп ысулы – тротуарлар һәм юлларда сак йөрү. Ашыгырга ярамый, чөнки имгәнүләрнең төп сәбәбе – гади ашыгу.
  • Бозлавыкка каршы төп корал - безнең аяк киеме. Һәркемгә билгеле булганча, бозлавык вакытында биек үкчәле итекләрдә йөрү  куркыныч. Аяк киеме сатып алганда табандагы рәсемнең тирән булганын сайлагыз!
  • Мөһим! Әгәр яңа пар аяк киеме сатып алу сезнең планга керми икән, аны камилләштерергә булган. Ничек итеп? Кичтән итекнең коры табанына «Момент» җилеме ярдәмендә ирекле рәсем ясагыз, өстенә ком сибегез һәм аның кипкәнен көтегез. Иртән бозлавыкта аерманы яхшы тоярсыз.
  • Иң зур куркыныч караңгы вакытта сагалый, чөнки эңгер-меңгер вакытта бозлавыклы юл  яхшылап күренми.  Өлкәннәргә һәм күрү сәләте зәгыйфь булган кешеләргә аеруча сак булырга кирәк. Шул ук киңәшләребез -  йөкле хатын-кызларга да. Эшлисе эшләрне, барасы җирләргә барып кайтуны көннең якты вакытында башкарырга кирәк.

    Шулай да, таеп  егылып, имгәнү алгансыз икән,  травматология пунктына яки кичектергесез медицина ярдәме пунктына мөрәҗәгать итәргә ашыгыгыз.

       Юлларда сак һәм игътибарлы булыгыз!

Республика медицина профилактикасы һәм җәмәгатьчелек сәламәтлеге үзәгенең баш табибы Алиса Мамаева.

Автор:Таҗиева Руфина