Магнит шарчыклар йоткан

Сабый аларны тәм-том дип уйлагандыр инде – Мәскәүдә 3 яшьлек кыз бала магнит шарчыклар йоткан.

Башкаланың Сперанский исемендәге балалар клиник дәваханәсе табиблары ашыгыч рәвештә операция ясап, баланың гомерен саклап калганнар. Хирурглар әйтүенчә, шарчыклар бала ашказанында 3 көн йөргән. Сабыйны дәваханәгә китергәндә аның эче авырткан, ул коскан. Баксаң, теге магнит шарчыклар бер-берсенә тартылып, эчәклектә “үтмәслек” хәл тудырганнар. Җитмәсә, бер урында эчәкне үтәдән-үтә зарарлаганнар.

Табиблар тырышлыгы белән сабый исән калган. Организмнан 4 чит әйбер – шарчыклар алынган. Шунда бер уңайдан сукыр эчәгесеннән дә коткарганнар. Хәзер сабыйның хәле әйбәт, аны дәваханәдән чыгарганнар инде. Ә табибларга афарин!