100 яшьлек ветеран – районның Мактаулы гражданины

Борай районында Бөек Ватан сугышы ветераны Миңнерәшит Сәфиуллинга “Борай районының Мактаулы гражданин” исеме бирелгән.

Миңнерәшит Шәислам улы 1925 елда Котлыяр авылында туа. Бөек Ватан сугышы башлангач, 17 яшендә, яшьтәшләренең күбесе кебек үк, үз теләге белән Ватанны сакларга фронтка китә. Җиңүдән соң хәрби хезмәтен Кореяда һәм Владивостокта дәвам итә, өенә 1950 елда гына кайта. Сугыштан соңгы елларда туган авылын тергезүдә актив катнаша, колхозда эшли.

“1951 елда Мәрзия апа белән тату гаилә коралар, бер кыз һәм ике ул үстерәләр, ә хәзер оныкларын, оныкчыкларын тәрбияләүдә ярдәм итәләр.

Миңнерәшит Шәислам улының тормыш юлы – батырлык һәм Ватанга ихлас хезмәт итүнең ачык үрнәге. Миңнерәшит абыйга ныклы сәламәтлек, иминлек һәм якыннары әйләнәсендә озын гомер телибез”, – дип язган хакимият башлыгы Рушан Гәрәев үзенең социаль челтәрләрдәге сәхифәләрендә.