“Хәтер мәңгелек”

Куркыныч коралланган фашист илбасарларына каршы баскан, балалары, оныклары тыныч күк йөзе астында бәхетле яшәсен, дошман илгә үтеп кермәсен дип, тынычлык өчен гомерләрен биргән, бик бәхетлелеләре генә туган якларга исән әйләнеп кайткан карт картәтиләрегез ул, балалар! Тылдагы бөтен авырлыкларны иңнәрендә күтәргән, ул сынаулы елларны кичкән кешеләр – ирләре эшенә җигелгән, Җиңү өчен бөтен сәламәтлеген, гомерен биргән карт картәниләрегез ул, дусларым! Бүген бик-бик аз инде ул сугышны, тыл авырлыкларын кичкән әби-бабайларыбыз. Без аларны хөрмәт итәргә, булдыра алган кадәре игътибар бүләргә бурычлыбыз. Бүген махсус хәрби операциядә катнашучы әтиләрегез, абыйларыгыз, апаларыгыз шундый ук куркыныч дошманга каршы басты. Алар картәтиләре эзеннән, аларның эшен дәвам итә. Кара уйлы дошман сезнең матур киләчәкне җимерә алмасын, якты тормышыбызга кара таплар кертмәсен өчен үз гомерләрен дә кызганмый. Без бүген нишли алабыз? Безнең бурыч – батырлар турында онытмаска! Каһарманнар турында язарга, сөйләргә, истәлекләр барларга тиешбез. Бөек Җиңүнең 80 еллыгы уңаеннан “Хәтер мәңгелек” дип исемләнгән иҗади бәйге игълан итәбез. “Чаткылар”да сезнең иншаларыгызны, сурәтләрегезне көтеп калабыз. Бәйге ел ахырына кадәр дәвам итә. Һәркайсыгыз үзенең кадерле әби-бабалары турында тагын бер хәтерне яңартып, истлекләрне мәңгеләштерүгә актив кушылыр дип ышанабыз. Сездән эшләр көтәбез.