“Без бармасак, кем бара?”

Һәр чорның үз геройлары була. Бүген алар – махсус хәрби операциядә катнашучы, илебезне яклаучы яугирләребез. Яшьләргә патриотик тәрбияне нәкъ алар үрнәгендә бирү мөһим. 

 2022 елда игълан ителгән өлешчә мобилизация Миякә районының Кыргыз-Миякә авылында яшәүче Сәгыйтов Илгиз Факил улының Себер тарафларына вахтага йөреп эшләгән чагына туры килә. “Мин Уфа шәһәрендә пропискада, шәһәрдән шалтыратып повестка китерүләрен әйттеләр, - дип искә ала өч ел элек булган вакыйгаларны Илгиз. – Уфага барып повестканы үзем алдым. Донбасста махсус хәрби операция баруын барыбыз да белә идек, без дә бармасак, кем бара инде тагын?

Илгиз МХОга кадәр Уфа шәһәрендә нефть-техник көллиятен тәмамлый, Энгельс шәһәрендә ракета гаскәрләрендә хезмәт итеп Ватан алдындагы бурычын үти, өйләнә, тормыш иптәше белән Кыргыз-Миякәдә йорт салып керәләр, ике бала тәрбиялиләр.

• Вахтага эшкә йөреп өйрәнгәч, МХОга китүе авыр булмады, - ди Илгиз. – Монда ял әзрәк, әлбәттә, өйгә сирәгрәк кайтыла. Әлеге вакытта мин Херсон өлкәсендә оборонада торам. Өлкән водитель булып хезмәт итәм. Миналар, китерелгән гуманитар йөкләрне таратабыз.
• СВОда, әлбәттә, җиңел түгел, - ди “Сагит” позывнойлы яугир. – Безгә сезнең – тылдагыларның – ярдәмен тою көч бирә, рухыбызны күтәрә. Сезнең хатлар, рәсемнәр безнең өчен аеруча мөһим. Без аларны блиндажларда элеп куябыз. Хәзер инде алар миндә бик күп җыелды. Башка полктагы егетләр кереп укый да... күзләренә яшь килә. Әлеге хатлардан туган як җылысы бөркелеп тора. Рәхмәт сезгә! Һәрбер сугыш җиңү белән тәмамлана, без дә тиздән Җиңү белән кайтачакбыз!

“Сугышта курку хисе буламы? Алыш барышында яугирләр нинди хисләр кичерә? Беренче бәрелешне хәтерлисезме?” Аңа бу сорауларны еш бирәләр.

• Һәр ир-егет армиядә хезмәт итәргә, бу сынау һәм чыныгу чорын үтәр­гә тиеш. Армия шартларында тормышның, якыннарыңның кадерен ныграк аңлый башлыйсың. Армия егетләрне кыю ирләр итеп тәрбияли, – ди яугир.