“Үзем теләп киттем”

Украинадагы махсус хәрби операциядән кыска вакытлы ялга кайткан “Дикий татарин” позывнойлы яугир белән аның өендә очраштык.

43 яшлек ир 2022 елда мобилизация игълан ителеп, повесткалар тарату башлангач, хәрби комиссариатка үзе барган.

• Мин заманында контракт буенча Чибәркүлдә хезмәт иттем, – дип бәян итте егет. – Армия хезмәтен эчке гаскәрләр составында пехотада үттем. Хәрби җыеннарга еш кына йөрдем, шуңа, мобилизация башлангач, җаным түзмәде, командованиелар исемлегендә мин бар микән дип белешергә киттем. Миңа иртүк әйберләр белән килергә куштылар.
• Ә ул вакытта кайда эшли идең? – дик кызыксынам.
• Иске Тукмаклы авылында мәктәпне тәмамлагач, БДПУда физика-математика факультетында белем алдым. Контракт буенча да хезмәт итеп карадым, сак бүлегендә дә эшләдем. Соңгы елларда Себер тарафларына “Геофизика” оешмасына йөреп эшләдем. 15 һәм 17 яшьлек ике улым бар.

Әлеге вакытта Донецк өлкәсендә Петровск поселогында моторчы вазифасында хезмәт итәм. Бу Волновах ягында. Танклар, БМПлар, МТЛБлар төзәтәм.

• Кайда яшисез?
• Бурятия, Якутиядән килгән хәрбиләр белән бергә өй арендалап яшибез. Мин хезмәт иткән җирдә башкортстанлылар юк, мин берүзем. Мобилизация буенча хәрби хезмәткә алынгач, мине Чита өлкәсенә озаттылар. Мин шушы егетләр белән Читадан Украинага киттем.

Чәй әзерләп йөргән әнисе Сөмбелә Назыйф кызы тормыш иптәше белән өч малай тәрбияләп үстергәннәр. Тормыш иптәше күптән ахирәттә, Сөмбелә ханым әлеге вакытта икенче улы  белән яши.

• Минем әткәй 18 яшьтә сугышка киткән, - диде Сөмбелә апа. – Җиде ел йөреп, Җиңү яулаганнан соң да ике ел үткәч кенә ике “Кызыл йолдыз” белән кайткан. Улым да: “Картәти сугыштан исән кайткан бит, мин дә исән кайтырмын әле”, - диде.

"Дикий татарин" кыска вакытлы ялларга инде берничә тапкыр кайтып киткән. “Ил көннәребез тизрәк тынычланып, балакайларыбыз тизрәк әйләнеп кайтсыннар иде”, – ди әнисе.

Исегезгә төшерәбез, РФ Оборона министрлыгы белән контракт төзер өчен 177 бердәм номерына, 122 номеры яисә (347) 218-19-19 буенча Ситуация үзәгенә шалтыратып, яисә якындагы күп функцияле үзәкнең офисына “Мои документы” бүлегенә мөрәҗәгать итәргә була. Контракт буенча хәрби хезмәт һәм махсус хәрби операциядә катнашучылар, аларның гаиләләренә күрсәтелә торган социаль ярдәм чаралары турында тулырак мәгълүматны башбат.рф сайтыннан, Телеграм каналындагы чат-ботлардан табарга була.