Мобилизацияләнгән мөселманнар өчен дога җыентыклары

Ут күршебез Татарстан мөфтиятенең «Хозур» нәшрият йорты Русия мөселманнарының күпсанлы үтенечләрен исәпкә алып, Татарстаннан һәм илебезнең башка субъектларыннан мобилизацияләнгән дин кардәшләребез, шулай ук аларның туганнары һәм якыннары: хатыннары, ата-аналары, балалары өчен өстәмә тираж белән 20 мең данәдә «Молитвы – дуа» дип исемләнгән кесә җыентыгын нәшер итәчәк. Китапларны бастыру чыгымнарын үз өстенә хәйрияче алды.

Тиражның бер өлеше 3нче ноябрьгә, ә калганы – киләсе атна дәвамында әзер булачак. Бу хакта ТР Диния нәзарәте хәбәр итә.

Моңа кадәр әлеге китаплар Казандагы мобилизацияләнгән солдатларны җыю пунктларына килгән дин кардәшләргә 4500 данәдә бушлай таратылган иде.

Китаплар – уч төбенә сыйдырышлы, димәк, солдатлар аларны һәрвакыт үз янында тота һәм махсус хәрби операция вакытында авыр минутларда файдалана ала. «Молитвы – дуа» дип исемләнгән басмада Аллаһыдан ярдәм һәм яклау сорау өчен, шулай ук борчылу һәм куркудан, дошманнардан котылу өчен һ.б. догалар тупланган.

Чыганак: "Татар-информ".