“Елга амбассадорлары”

Уфа районының Авдон авылында “Елга амбассадорлары” экологик проектының беренче зона форумы узачак. Оештыручылар балалар белән эшләүче педагогларны, китапханәчеләрне һәм өстәмә белем бирү белгечләрен экологик тәрбиянең заманча уен форматларын үзләштерергә чакыралар.

“Елга амбассадорлары” проекты мәгариф хезмәткәрләренә экологик активлык үткәрү өчен әзер инструментлар тәкъдим итә. Форумда катнашучылар экоквест узып һәм мастер-классларда булып кына калмыйча, алга таба эшләү өчен методик материалларның тулы комплектын да алачак.

Һәр катнашучыга остаз җыелмасы биреләчәк: “Амбассадоры рек” өстәл уены, “Водорослям крышка” уены, экоквест сценарие, эшкәртү мини-музее, тематик стендлар һәм плакатлар, методик материаллар һәм остазның исем сертификаты.

Уку бер көн белән генә чикләнмәячәк. 2026 елның ноябреннән 2027 елның февраленә кадәр педагоглар үз оешмаларында экологик чаралар үткәрәчәк һәм проектның гомум рейтингында катнашачак. Иң актив белем бирү учреждениеләре үз базаларында экофестиваль үткәрү мөмкинлеге алачак, ә иң яхшы 30 педагог 2027 елның июнендә йомгаклау форумына чакырылачак.

Әйткәндәй, чара ил җитәкчесе Владимир Путин тарафыннан билгеләнгән “Экологик иминлек” милли проекты кысаларында оештырыла.