Эшкуарларга процент ставкасын төшергәннәр

Креатив индустрия өлкәсендә эшләүче эшкуарларга Башкортстан микрокредит компаниясе ташламалы микрозаймнар буенча түбән процент ставкаларын тәкъдим итә: залог биргәндә еллык 8% һәм поручительлек рәсмиләштергәндә еллык 12%. Бу хакта БР Хөкүмәте матбугат хезмәтендә хәбәр иттеләр. Креатив индустрияләргә дәүләт ярдәме Башкортстанда бизнесны үстерү өчен яңа офыклар ача, дип билгеләделәр БР эшмәкәрлек һәм туризм министрлыгында. „Нәтиҗәле һәм конкурентлы икътисад " милли проекты кысаларында Башкортстан микрокредит компаниясеннән ташламалы микрозаймнар — талантны монетизацияләү һәм иң кыю иҗади проектларны гамәлгә ашыру өчен реаль корал», - дип шәрехләде БР эшмәкәрлек һәм туризм министры Светлана Верещагина. Исегезгә төшерәбез, 2025 елда «Россия Федерациясендә креатив (иҗади) индустрияләрне үстерү турында» Федераль закон үз көченә керде, ул әлеге юнәлешләрнең хокукый статусын ныгытып кына калмады, аларның ил икътисадына керткән өлешен дә ассызыклады. Башкортстанда сәнгать, дизайн, музыка һәм кинематограф өлкәсендәге проектлар санының тотрыклы үсеше күзәтелә. Республика уникаль иҗади продуктлар булдыруга һәм үстерүгә ярдәм итә торган ярдәм чараларын эзлекле рәвештә гамәлгә ашыра, дип өстәделәр БР эшмәкәрлек һәм туризм министрлыгында. Микрозаймнар алуга гаризалар компаниянең рәсми сайты аша, шулай ук МСП.РФ Федераль цифрлы платформасы аша кабул ителә. Элегрәк Башинформ Башкортстанда эшмәкәрләр саны артуы турында хәбәр иткән иде. 2026 ел ахырына кадәр Башкортстанда кече һәм урта эшмәкәрлек субъектлары санын 154 меңгә кадәр арттыру планлаштырыла.

Чыганак: Башинформ.