Төзелешкә игътибар зур бездә

8 апрельдә Башкортстан Башлыгы Радий Хәбиров видеоэлемтә режимында Русия Төзелеш министрлыгы коллегиясенең һәм Русия Федерациясе Дәүләт Советының «Яшәү өчен инфраструктура» юнәлеше буенча комиссиясенең уртак утырышында катнашты. Аны ил Хөкүмәте рәисе урынбасары Марат Хөснуллин үткәрде. Көн тәртибендә – төзелеш тармагының һәм торак-коммуналь хуҗалыкның нәтиҗәләре һәм төп бурычлары.

   - Узган ел «Яшәү өчен инфраструктура» милли проекты буенча эшнең беренче елы булды. Барлык планлаштырылган күрсәткечләр үтәлде. Бу гаять зур коллектив хезмәт нәтиҗәсе. Төзелеш тармагы икътисад драйверларының берсе булып кала бирә. Әйтик, аның эчке тулаем продуктка керткән өлеше 22 трлн. сум тәшкил иткән. Без 150 млн. кв.м күчемсез милек төзедек – бу Русия тарихында иң зур күләм, – дип ассызыклады Марат Хөснуллин. – 2030 елга кадәрге бурыч – илнең торак фондының өчтән бер өлешен яңарту һәм торак белән уртача тәэмин ителешне бер кешегә 33 кв.метрга кадәр күтәрү.

   Торак базары турында сөйләгәндә, вице-премьер ассызыклаганча, беренче чиратта сүз гаиләләрнең торак шартларын яхшырту мөмкинлекләре турында бара. Ярдәмнең төп чарасы дип ул ипотеканы атады. 2018 елдан гамәлдә булган ташламалы ипотека программалары сакланып калган. Шул вакыттан бирле торак шартларын 3,8 миллионнан артык гаилә яхшырткан.

   Башкортстан «тормыш өчен Инфраструктура» милли проекты кысаларында гамәлгә ашырыла торган сигез федераль программада катнаша. Аерым алганда, төбәктә 2026 елда коммуналь инфраструктураны модернизацияләүгә 1,07 млрд сум күләмендә финанслау каралган, шул исәптән федераль бюджеттан – 695,1 млн сум. Барлыгы 46 чара планлаштырылган, шуларның тугызы – су белән тәэмин итү, су агызу һәм җылылык белән тәэмин итү объектларын төзү (реконструкцияләү) һәм 37се – капиталь ремонтлау.

   Моннан тыш, 2026 елда республикада «Уңайлы шәһәр мохитен булдыру» программасы буенча 152 иҗтимагый территория төзекләндереләчәк, шул исәптән 144е – федераль бюджет хисабына.

   Шулай ук 2026 елда төбәк һәм муниципальара әһәмияттәге автомобиль юлларын капиталь һәм агымдагы ремонтлауга 7,9 млрд сум күләмендә финанслау каралган, шул исәптән 7,15 млрд сум – федераль бюджеттан.

Фото: nuriman.pro