Законсыз киселгән чыршылар саны азайган

Башкортстан урман хуҗалыгы министрлыгында 2025 елның 24 ноябреннән 2026 елның 8 гыйнварына кадәр үткәрелгән «Чыршы-2025» оператив-профилактик операциясе нәтиҗәләре билгеле булды.

2025 елның 25 ноябреннән 2026 елның 8 гыйнварына кадәр төбәктә 1533 рейд үткәрелгән. Урманнарны саклауга, дәүләт  урман инспекторларыннан тыш, Дәүләт техник күзәтчелеге белгечләре, казак җәмгыятьләре һәм җәмәгать инспекторлары да кушылды. БР буенча Эчке эшләр министрлыгы белән берлектә оештырылган 60 стационар пост һәм 156 мобиль төркем булдырылды. Параллель рәвештә урман инспекторлары легаль әзерлекне тикшергән. Алар 50 гектардан артык мәйданлы 21 кишәрлектә Яңа ел чыршыларын әзерләүне тикшерде.

Әлеге сезонда законсыз киселгән ылыслы агачлар саны җиде тапкырга диярлек кимеде — бу үткән ел белән чагыштырганда 149 берәмлеккә кимрәк. Барлыгы ылыслы яшь агачларны (26 агачны) законсыз кисүнең 12 очрагы теркәлгән. Урман фондына гомуми зыян 86,5 мең сум тәшкил иткән. Ике эпизод буенча материаллар җинаять эше кузгату өчен Эчке эшләр министрлыгына җибәрелгән.

2026 елда Башкортстан урман хуҗалыгын үстерүгә «Экологик иминлек» милли проектының «Урманнарны саклау» федераль проекты кысаларында 280 млн сум акча алачак.