Авылда медпунктсыз булмый

Бакалы районының Таллысыза, Дияш һәм Камышлытамак авылларында заманча фельдшер-акушерлык пунктлары ачылды.

Алар ил җитәкчесе Владимир Путин тарафыннан билгеләнгән “Дәвамлы һәм актив тормыш” милли проекты буенча ачылды, дипләр Бакалы районы хакимиятендә.

Элек медицина хезмәткәрләренә еш кына медицина таләпләренә һәм стандартларына җавап бирмәгән биналарда ярдәм күрсәтергә туры килгән. Хәзер иске биналар урынына заманча модульле комплекслар барлыкка килде, алар пациентларның уңайлылыгы өчен кирәкле барлык әйберләр белән җиһазландырылган.

Һәр ФАПта прививка ясату, фельдшер һәм акушерлык каравы бүлмәләре бар. Аларда консультация алырга, булачак әниләрнең сәламәтлеген күзәтергә мөмкин. Шулай ук дарулар һәм медицина җиһазларын саклау бүлмәсе дә бар.

Шуны да билгеләргә кирәк: соңгы елларда Бакалы районында 23 модульле ФАП төзелде һәм файдалануга тапшырылды.