Авыл халкы яңа ФАПка шат

Агымдагы елның февралендә Шаран районы Сакты авылында яңа фельдшер-акушерлык пункты ачылды. Бу ил җитәкчесе Владимир Путин тарафыннан билгеләнгән “Дәвамлы һәм актив тормыш” милли проектын гамәлгә ашыру нәтиҗәсендә мөмкин булды.

Элек ФАП 1977 елда төзелгән бинада булган, анда су һәм канализация булмаган. Яңа бина заманча таләпләргә һәм стандартларга туры килә. Ул халыкка сыйфатлы медицина ярдәме күрсәтү һәм персоналның уңайлы эшләве өчен кирәкле барлык әйберләр белән җиһазландырылган. ФАПта фельдшер кабинеты, процедура бүлмәсе, пациентлар өчен көтү бүлмәсе, санузел, персонал, медикаментлар саклау өчен бүлмәләр бар. Өлкән яшьтәгеләр һәм аз хәрәкәтләнүчеләр өчен керү юлында пандус урнаштырылган. Яңа ФАП Сакты, Васильевка, Яңа Кнәз, Владимировка, Александровка авылларына хезмәт күрсәтә.

– Авыл халкы яшәү урыныннан ерак булмаган яңа бинада диспансеризация узу, вакцина ясату һәм беренчел медицина-санитария ярдәме алу мөмкинлеге булуга шат. Бу ФАПта беренчел медик-санитар ярдәм 266 кешегә, шул исәптән 55 балага күрсәтелә, – ди медицина өлкәсендә 40 ел эшләүче акушерка Римма Гәрәева.