Салаватта Бөтендөнья Игелек көненә багышланган чара оештырылды

Салават шәһәрендәге «Своя химия» яңа буын китапханәсендә Бөтендөнья Игелек көненә багышланган «Кайда яхшылык, шунда җылылык» дигән чара узды. Аны Русия Федерациясе Президенты Владимир Путин указы белән булдырылган «Мәдәният» милли проекты максатларына туры китереп «ЖесТы»инклюзив клубында оештырганнар.

Бөтендөнья игелек һәм хөрмәт көне 13 ноябрьдә билгеләп үтелә. Ул тирә-юньдәгеләргә карата кайгыртучанлык һәм ихтирам күрсәтүнең әһәмиятен, игелекле гамәлләрнең дөньяны яктырак итә алуын искә төшерә. Очрашу күңел җылысы белән һәм шатлык атмосферасында узды. Клуб әгъзалары бер-берсе белән аралаша, шатлыклары белән уртаклаша алдылар, шаярту викторинасында актив катнаштылар һәм хәтта пантомималар да күрсәттеләр.

"Без һәрвакыт китапханәдә уздырыла торган чараларда катнашабыз. Бу кызыклы, күңелле һәм мавыктыргыч, һәм һәрвакыт яңадан киләсе килә", - дип үз тәэсирләре белән уртаклашты Салаватта яшәүче Лидия Тягунова.

"Бу көн — һәр яхшы сүз, гамәл яки фикер үзенчәлекле мәгънәгә ия булган көн. Игелек һәм хөрмәт көне башкалар өчен күңелле нәрсә эшләргә һәм көндәлек тормышта кайгырту һәм симпатия күрсәтүнең никадәр мөһим булуын искә төшерергә менә дигән сәбәп. Ул җәмгыятькә һәм туганнарга янәшәдә кайгыртучанлык һәм игътибар таләп итүче кешеләр яшәвен искә төшерә!", — дип билгеләп үттеләр Салават администрациясендә.

Юлай НИЗАЕВ.

Фото: Салават хакимияте матбугат хезмәте.