Концерт карыйм дип, еракка йөрисе түгел

Дәүләкән шәһәрендә виртуаль концерт залы ачылды.

Ул Дәүләкән шәһәренең балалар китапханәсендә ил җитәкчесе Владимир Путин тарафыннан билгеләнгән “Мәдәният” милли проекты ярдәмендә ачылган.

Уникаль мәйданчыкны югары сыйфатлы аудио- һәм видеотрансляцияләр өчен өр-яңа корылмалар белән җиһазландырганнар. Биредә концертлар, патриотик һәм танып белү программалары, шулай ук театр әсәрләрен күрсәтергә планлаштыралар.

“Виртуаль концерт залын ачу – безнең шәһәр өчен зур вакыйга. Хәзер Дәүләкән халкы шәһәрдән читкә чыкмыйча да билгеле артистларның чыгышларын карый алачак. Бу классик һәм заманча музыкага күбрәк кешене җәлеп итәргә мөмкинлек бирәчәк”, – ди Дәүләкән районы хакимияте башлыгы вазифаларын башкаручы Виктор Маслов.

Әйткәндәй, Башкортстанда милли проект ярдәмендә китапханәләр базасында барлыгы ун виртуаль концерт залы ачылды.