Урманнарны яшәртү эшләре тукталмый

Урман хуҗалыгы белгечләре әйтүенчә, сыйфатлы яшь үсентеләр үстерү гади эш түгел. Ул - урман хуҗалыгында зур игътибар һәм тырышлык таләп иткән эшләрнең берсе. Чәчелгән үсентеләрне даими карап, тиешенчә тәрбияләргә кирәк. Чүп басып китмәсен, туфраклары гел дымлы булсын.
Башкортстан урманчылары утырту материалларын республика урманлы районнарының географик һәм климат шартларына яраклаштырып үстерә. Шуңа да алар яхшы тамыр алып, ныгынып китәләр. Мәсәлән, Урал арты районнарында ылыслылардан нигездә - нарат, төньяк районнар туфрагында исә чыршылар мәһабәт булып үсә.
Яшь урман утырту буенча агротехник чаралар үткәрү өчен учреждениеләр "Экология" милли проектының "Урманнарны саклау" федераль программасы булышлыгында махсус техника һәм корылмалар белән баетылган.
Хәбәр итүебезчә, быел республика урман хуҗалыклары 3,2 тонна агач орлыгы әзерләгән. Бу үткән елга караганда бер тоннага күбрәк.