Мәскәү авылыннан Мәскәү шәһәренә

Дүртөйле районы Мәскәү авылы мәктәбенең татар теле һәм әдәбияты укытучысы Эльза Мөхәммәтҗанова конкурска сайлап алу турын уңышлы узды һәм 8 октябрьдә илебез башкаласына сыйныф җитәкчеләренең I Бөтенрусия форумына юл тотачак. Болар барысы да «Мәгариф» милли проекты ярдәмендә мөмкин булды.

Катнашу өчен барлыгы 21000нән артык гариза бирелгән. Конкурс нәтиҗәләре буенча бөтен илдән 1000 сыйныф җитәкчесе Мәскәүдә җыелачак.

Форум Русия мәгарифенең конкуренциягә сәләтлелеген тәэмин итү, Русия Федерациясе халыкларының рухи-әхлакый кыйммәтләре нигезендә гармонияле үсеш алган һәм социаль җаваплы шәхес тәрбияләү мәсьәләләре буенча бөтен Русиядән сыйныф җитәкчеләрен берләштерәчәк.

"Эльза Мөхәммәтҗанова-районның даими рәвештә белем бирү белән шөгыльләнүче, укучыларны укыту һәм тәрбияләүдә яңа иҗади алымнар эзләүче иң яхшы укытучыларының берсе. Аның ничек өлгерүенә гаҗәпләнәбез! Аның белән горурланабыз! Чөнки ул һәм аның укучылары белемнәре буенча Башкортстанны гына түгел, Русия Федерациясен дә яулыйлар. Узган уку елында аның укучысы Самира Мусина Казан шәһәрендә татар теле буенча олимпиада җиңүчесе һәм Халыкара олимпиада призеры булды, анда Татарстан Республикасы Хөкүмәте премиясенә лаек булды», - дип сөйләде Мәскәү авылы мәктәбе директоры Илнур Садрисламов.