40 яңа автобус кайтты

Быел Башкортстан районнарына хезмәт күрсәтү өчен билгеләнгән комфортлы автобусларның беренче партиясе килде. Бу хакта 14 мартта социаль челтәрләрдә республика башлыгы Радий Хәбиров хәбәр итте.

«Башавтотранс» автопаркы 40 берәмлек «Форд Транзит» маркалы автобус белән тулыланды. Пассажирлар өчен максималь хәвефсез һәм уңайлы машиналар йомшак креслолар, иминлек каешлары, ГЛОНАСС спутник навигациясе системасы, тахографлар белән җиһазландырылган, шулай ук кондиционерлау системасы һәм өстәмә җылылык белән тәэмин ителгән. Бу машиналар иң кирәкле юнәлешләргә куела: Стәрлетамак, Ишембай, Раевка, Дәүләкән, Чакмагыш, Архангель, Благовещенск. Без 2020 елда барлыгы 527 зур һәм урта сыйдырышлы автобус сатып алырга ниятлибез. Безнең теләк буенча автобус җитештерүче пассажирларга уңайлы булсын өчен багаж өчен югары полкалар эшли һәм һәр утыргычка индивидуаль яктырту өстәлә", - дип хәбәр итте төбәк җитәкчесе.

Барлык автобуслар да «Алга» бердәм транспорт картасы буенча йөрү өчен терминаллар белән җиһазландырылган.

«Республика буенча автобусларда пассажирлар әйләнеше арта бара. Узган ел «Башавтотранс» 402 миллионнан артык пассажирга хезмәт күрсәтте, бу 2018 елдагыдан алты миллионга күбрәк. Гыйнвар аенда үсеш тагын 11 процентка артты. Җәмәгать транспорты белән халыкны хезмәтләндерү күп кырлы эш. Ул хәрәкәт составын һәм маршрут челтәрен яңартуны да үз эченә ала. Быел 500дән артык уңайлы автобус сатып алу планлаштырыла", - дип белдерде Транспорт һәм юл хуҗалыгы буенча Дәүләт комитеты рәисе Тимур Мөхәммәтҗанов. Комитет рәисе яңа автобуслардан ачкычлар тапшырды.

Әлеге чаралар Владимир Путинның май указларына ярашлы "Хәвефсез һәм сыйфатлы юллар" милли проекты кысаларында башкарыла.