13 шифаханәдә 36 мең бала ял итә

БР Сәламәтлек саклау министры вазифасын башкаручы Максим Забелин белдерүенчә, Башкортстанда бүген 13 дәүләт балалар шифаханәләре эшләп килә. Аларда, гомум алганда, 2604 койка-урын исәпләнә, шуларның 885ендә балалар әти-әниләре белән бергә ял итә һәм дәвалана. Ел саен шифаханәләргә республика казнасыннан 620 миллион сумнан артык акча бүленә.

Шифаханәләрдә дәваланучылар саны елдан-ел үсә бара, 2018 елда әлеге күрсәткеч 36 мең балага җиткән. Агымдагы елның 9 ае эчендә 30 меңнән артык бала дәваланган, бу максатка 680 миллион сум акча тотылган.