Яшьләр табиб һөнәре белән кызыксына

Русия Сәламәтлек саклау министрлыгының Башкорт дәүләт медицина университеты абитуриентларының беренче курска укырга керүе турындагы төп фәрманга кул куелды, беренче курска укырга керүчеләр составы расланды. Бу Университет Кабул итү кампаниясе 2025 кысаларында бакалавриат һәм специалитет программалары буенча бюджет урыннары конкурсына йомгак ясый дигән сүз.
Ел саен университетта бюджет урыннары саны арта. Быел бу сан 147-гә артты һәм 1150 бюджет урынын тәшкил итте. 2024 елда 1003 бюджет урыны саналган. Алда - махсус урта белем бирү, ординатура һәм түләүле уку программаларына кабул итү йомгаклары көтә.
Иң мөһиме, быелгы укырга кабул итү кампаниясендә БДМУ сәләтле абитуриентларның медицина һөнәренә кызыксынуының чирек өлешкә артуын күрсәтә. Бу Башкорт дәүләт медицина университетына укырга керергә теләүчеләр саны үткән елга караганда 30 процентка арткан дигән сүз. Вузда йөз балл җыючылар биргән гаризалар саны арткан һәм "Дәвалау эше" һәм "Педиатрия" бүлекләренә укырга керү баллы сизелерлек дәрәҗәдә арткан.
Быел бакалавриат, специалитет программаларына бирелгән гаризалар саны 15 меңгә якын булган. 2024 елда исә 10 630 гариза бирелгән.
Озак вакытлар эчендә беренче тапкыр "Стоматология" программасына бюджет урыннары саны 2 тапкырга арткан. 2024 елда 25 булса, 2025 елда 50-гә җиткән.
Вузга укырга керү баллы артуы БДИның югары нәтиҗәләре белән килгән абитуриентларның укырга керүенә ярдәм иткән. Агымдагы елның укырга кабул итү кампаниясе барышында 100 балл һәм югары баллар җыючылар саны ике тапкырга диярлек арткан. 2024 елда ул сан 15 һәм 32 булса, 2025 елда - 26 һәм 41-гә җиткән. Быел, үткән елга караганда, медицина университетына мәктәп укучыларының бөтенрусия олимпиада җиңүчеләре һәм призерлары 4 тапкырга күбрәк укырга кергән.
2025 елда РФ Хөкүмәте квотасы буенча чит ил гражданнарын укырга кабул итү географиясе сизелерлек киңәйгән. Мәсәлән, БДМУда белем алучы 64 ил исемлегенә Ботсвана Республикасы, Сан-Томе һәм Принсипи, Сьерра-Леоне, Тоголез Республикасы һәм Комор Утраулары Союзы студентлары өстәлгән.
Русия Сәламәтлек саклау министрлыгының Башкорт дәүләт медицина университеты белем бирү, фән һәм клиник практикада динамикалы иннновацион үсеш күрсәтеп, абруйлы исемлекләрдә үзен күрсәтә. БДМУ ышанычлы рәвештә Русиянең иң яхшы 3 медицина университетына керә.
БДМУның Идел буе федераль округында иң зур медицина университеты булуын да билгелик. Вузда 15 меңнән артык студент белем ала, шуларның 5 меңе - 64 илдән килгән чит ил гражданы.