Студентлар өчен – 1600 эш урыны

Быел Башкортстан студентлары 1600дән артык эш урыны алачак.

Республика хакимияте төзелештән алып медицинага кадәр алты юнәлеш буенча 43 хезмәт проектын оештыручы 45 предприятиене билгеләде. Бу хакта Студотрядларны үстерү мәсьәләләре буенча ведомствоара координацион советның беренче утырышы нәтиҗәләре буенча билгеле булды.

Республиканың студент отрядлары яңадан тергезелүгә – ун ел. Шул вакыт эчендә катнашучылар саны 213тән 5987 кешегә кадәр артты. 27 меңнән артык студент беренче эш урыны алды. 2022-2024 елларда Башкортстан студотрядлары 1,2 млрд сумнан артык акча эшләгән.

Төбәк Башлыгы кушуы буенча Башкортстанда яңа эш урыннары булдыру, хезмәт шартларын яхшырту һәм студентларны мотивацияләү өстендә эш алып барыла. Быел югары уку йортлары базасында – 54 һәм көллиятләр базаларында 18 яңа студотряд төзү планлаштырыла.

“Мәктәп укучыларын да җәлеп итәргә уйлыйбыз – бу аларга беренче хезмәт тәҗрибәсен алырга ярдәм итәчәк”, – диде Радий Хәбиров.

“Русия студентлар отрядлары” төбәк оешмасы җитәкчесе Ирина Сухарева республиканың иң яхшы студотряды өчен Башкортстан Башлыгының күчмә байрагын булдырырга тәкъдим итте.