Акмулла сүзе

Шагыйрь һәм мәгърифәтче Мифтахетдин Акмулланың туган көнендә – 14 декабрьдә республикада Башкорт теле көне билгеләнәчәк.

Бу бәйрәм 2019 елда төбәк Башлыгы Радий Хәбиров указы белән оештырылды. Ният ителгән чаралар турында оператив киңәшмәдә Башкортстан мәдәният министры вазифасын башкаручы Илнур Мухьянов сөйләде.

Аның әйтүенчә, бу көнне барлык муниципалитетларда да мәгариф, мәгърифәтчелек һәм мәдәни-ял чаралары узачак. Уфа мәйданчыкларында гына 50дән артык вакыйга каралган.

Бәйрәм программасы Башкорт дәүләт педагогия университеты каршындагы Мифтахетдин Акмулла һәйкәленә чәчәкләр салу тантанасы белән башлана. Шунда ук Акмулла исемендәге стипендиягә таныклыклар тапшырылачак. Университетның үзендә онлайн-режимда “Акмулла диктанты” халыкара акциясе һәм “Акмулла сүзе” республика бәйгесе үтәчәк. Моннан тыш, республиканың барлык белем бирү учреждениеләрендә “Башкорт телен яратам” исемле бердәм дәрес узачак.

Бу көн мәдәни һәм мәгърифәт чараларына бик бай булачак.