2022-2023 уку елында мәктәп каникулларының вакыты билгеле булды. Ул «Объясняем. РФ» порталында чыккан.
Чирекләр буенча укый торган мәктәпләр өчен көзге каникуллар 29 октябрьдән 6 ноябрьгә кадәр дәвам итәчәк. Кышкысы – 31 декабрьдән 8 гыйнварга кадәр һәм язгы каникуллар – 8 апрельдән 16 апрельгә кадәр.
Мәктәп хакимияте үзенең датасын билгели ала, диелә әлеге хәбәрдә.
Көзге каникуллар чорына 4 ноябрьдә билгеләп үтелә торган дәүләт бәйрәме – Халыклар бердәмлеге көне туры килә. Шулай итеп, русиялеләр өч көн рәттән – 4-6 ноябрьдә ял итәчәк.
Кышкы каникуллар Русиядә яңа ел бәйрәмнәре белән тулысынча туры килә һәм тугыз көн дәвам итәчәк.