Башкорт теленнән халыкара онлайн-диктантны 305 мең кеше язды

Бөтендөнья башкортлары корылтаеның матбугат хезмәте хәбәр итүенчә, анда Русиянең 18 төбәге һәм 24 чит ил катнашты. Аларның 39 214е – Русия төбәкләрендә яшәүче милләттәшләребез, 3395е – чит илләрдә яшәгән якташларыбыз.

Иң бәләкәй катнашучыга – 5 яшь. Ул Баймактан. Иң өлкән кешегә – 96 яшь. Ул Ишембай районында яши.

223 мең кеше bashkdictant.ru сайтында диктант язып, эшләрен җибәрде.

Хәтерегезгә төшерәбез, диктант башкорт телен башлангыч дәрәҗәдә белгәннәр, башкортча иркен аралашканнар һәм башкорт теленең төньяк-көнбаеш диалектында язганнар өчен оештырылды. Төньяк-көнбаеш диалектта диктантны 51 345 катнашучы язды.

Акциянең рәсми нәтиҗәләре 30 көн эчендә сайтка куела. Барлык катнашучыларга диктантта катнашу турында электрон сертификатлар җибәрелә.

Диктантны оештыручылар - Башкортстан Республикасының Мәгариф һәм фән министрлыгы, Башкорт телен саклау һәм үстерү фонды, Бөтендөнья башкортлары корылтае.