ӨМЕТ УЯТУЧЫ "ӨМЕТ"КӘ!

РАМАЗАН – ИЗГЕ АЙ

Килеп җитте инде менә

Көтеп алган Рамазан да.

Аллаһ ризалыгы өчен

Кердем изге Уразага.

Раббым, сиңа рәхмәтлемен:

Таң атканын һәр көн күрәм.

Шәфәкъ нуры балкыганда

Кояш баеганын беләм.

Ашау-эчүдән тыелгач,

Була ризык кадерлерәк,

Эчкән суым да ширбәттәй,

Икмәк тоела тәмлерәк.

Шатлыкны да, кайгыны да

Кабул итәм сабыр гына.

Бу дөньяда сынауларны

Бирә безгә Аллаһ кына.

Яман уйлар килми башка,

Күңел чистара, сафлана.

Изге гамәл кылу хисе

Җаннарымны биләп ала.

Кыйбла якка кулым сузып,

Изге догаларны кылам.

Намазларны, уразамны

Кабул итче, зинһар, Аллам!

Балаларым исән булсын,

Ил-көнебез имин торсын.

Күңелләргә изге айда

Изге иман нуры тулсын.

Уразабыз – фарыз гамәл,

Гыйбәдәтнең иң зурысы.

Аллаһ каршына илтүче

Юлларның да иң турысы.