Китап әзер!

Китап әзер!  Бүген хәбәр килде.

Куанычның юктыр һич чиге.

Яшь түгелмен.Ташкан хисләремне

Яшерергә буладыр инде...

Юк шул.Яңа китап чыгу бит ул--

Бала туугадыр бәрәбәр.

Сөендерде, гүя,  канат куйды,

Бәйдән ычкындырды бу хәбәр.

Кемдер өчен , бәлки, китап бары--

Язылганны бергә туплаучы.

Дулкынланам: якты хисләремне

Булыр микән төптән аңлаучы?

Һәр шигырьгә  салдым күңел нурын,

Уй-хисләрем уеп язылган.

Шатлык-кайгыларым сүзләремә,

Сәйлән белән каеп, тагылган.

Мин бәхетле , әгәр бик күпләрнең

Тетрәндерә алсам күңелен.

Йөрәктәген йөрәкләргә илтү--

Беләм бер дә җиңел түгелен.

Яңа китап чыкты! Күк кабагы

Ачылгандай кебек тоела!

Сабый бала кебек кулга алдым:

Аннан илаһи нур коела!

      Рәсимә Ильясова