"Нур"да чираттагы премьера

  Уфа “Нур” татар дәүләт театры Бөек Җиңүнең 80 еллыгын премьера спектакле белән каршылады.

Кичә, 21 мартта,  Уфа «Нур» татар дәүләт театрында Владимир Жеребцовның  пьесасы буенча «Яшик әле» драмасы күрсәтелде. Спектакльнең режиссеры һәм музыкаль бизәүчесе Азат Җиһаншин, ә адаптацияләнгән тәрҗемәсен Гөлнур Усманова башкарды. Сәнгать бизәлеше өстендә рәссам Полина Емельянова эшләгән. Видеорәссам Эльвина Тангатарова тамашачыларга экранда үз эшен тәкъдим итте. Спектакльнең лейтмотивы булган җырның композиторы - Юлай Үзәнбаев,  текст авторы - Айгөл Юлъякшина. Владимир Жеребцов әлеге пьесаны  Урал Галиевның  повесте буенча язган һәм анда Бөек Ватан сугышы учагы аша үткән буынның катлаулы язмышы тасвирлана. «Яшик әле» спектакле тамашачыларны тылга күчерә, анда сугыш, фронтның туры сызыгы булмауга карамастан, үзенең рәхимсезлеген күрсәтә. Геройлар күп югалтулар аша уза һәм катлаулы әхлакый сайлау ясый. Повесть Бөек Ватан сугышының реаль вакыйгалары турында сөйли, һәм бу спектакльгә үзенчәлекле эмоциональ тирәнлек бирә. Премьера Бөек Җиңүнең 80 еллыгына багышланган. Төп рольне – Муса образын Айнур Баянов башкара. Аның сөйгәне Гайнисаны талантлы актриса Чулпан Раянова гәүдәләндерә. Спектакльдә шулай ук танылган сәхнә осталары Фина Вәлиева, Миңнинур Сәитова-Гыйзәтуллина, Эльмир Хәертдинов, Эльмир Газизуллин, Илшат Салаватов, Альберт Шәйхетдинов һәм башка артистлар катнашты. Спектакльдән соң коллективны премьера белән Башкортстан Республикасы мәдәният министры урынбасары Ринат Гайсин котлады. Ул артистлар белән аралашты һәм аларга киләчәктә дә иҗади уңышлар теләде.

Премьераның кабат күрсәтүләре 22 март һәм 2 апрельдә узачак.

Айгөл Юлъякшина.

  Эдуард Зарипов фотолары.