Шигырь укып алыйк әле...

Һәркайсыбызның яраткан шагыйре бар. Аның шигырьләрен укып кайчан тирән уйларга калабыз, кайчан җан дәвасы алабыз...

   Бүген сезнең игътибарга Рәми Гариповның бер шигырен тәкъдим итәбез:

                              ***

Күпме генә яши җирдә кеше?

Күз ача да бары, күз йома!

Шул күз ачып йомган арада да

Күпме кәртә яткан юлына:

Әле ачлык, әле сугышлары,

 Әле бола, әле ялганы,

Гаделсезлек, дөнья ваклыклары –

Чылбыр төсле киткән ялганып!..

Ә кайчан соң кеше үз гомерен

Үз дигәнчә үтеп тәмамлар?..

 Кешеләргә авыр сүз әйтмәгез,

Кадергә дә хаклы бит алар!..

Фото: irbit.info