Экранда яңа фильм

Башкортстан юлдаш телевидениесе башкорт галиме, публицист һәм әдәби тәнкыйтче Зәбих Искужинга багышланган документаль-нәфис фильм төшерә. Фильм Гөлчәчәк Саламатованың «Зәбих Искужин: Идел ярында Сакмар егете» китабы буенча төшерелә.

Проект җитәкчесе — телеканалның баш мөхәррире Гүзәл Хәсәнова, сценарий авторлары — Гөлчәчәк Саламатова һәм Рәйсә Абдуллина-Казбулатова, оператор — Римзат Билалов.

Зәбих Искужин образын экранда М.Кәрим исемендәге Милли яшьләр театры актеры, Башкортстанның атказанган артисты Рәмзил Сәлмәнов башкара. Шулай ук Башкортстанның халык шагыйре Кадим Аралбай, Татарстанның халык шагыйре Рәдиф Гаташ, башкорт һәм татар галимнәре Миңлегали Нәдергулов, Рәмил Исламов, Миләүшә Хәбетдинова катнаша.

Фильм Зилаер районында, Казанда һәм Уфада төшерелде. Тамашачылар бу фильмны Башкортстан юлдаш телевидениесендә карый ала.