“Сеңелкәш” фильмы гран-при яулады

Башкортстан Республикасы Башлыгы Радий Хәбиров хөкүмәттә үткән оператив киңәшмәдә барлык республика халкына “Сеңелкәш” фильмын күрсәтергә чакырды. Русия режиссеры Александр Галибинның Мостай Кәримнең “Безнең өйнең яме” повесте буенча төшерелгән фильм Ялта шәһәрендә үткән “Евразия күпере” халыкара кинофестивалендә гран-при яулады. Тәҗрибәле жюри – режиссер һәм актер Кирилл Плетнев, актриса Ольга Кабо, Франция режиссеры һәм сценаристы Хәмид Бенамра, Болгария режиссеры һәм шагыйрә Майя Вапцарова, Испания кино белгече, фестиваль директоры Хайме Ногуэра, балалар һәм яшүсмерләр киносы буенча тапшырулар кураторы Пусане Анджела Ли бу фильмны югары бәяләде.

“Фильмның премьерасында мин шәхсән үзем булдым, - диде республика Башлыгы. – Мин барсына да аны карарга, күңелен чистартырга тәкъдим итәм”.

Радий Фәрит улы хөкүмәтнең вице-премьеры Ленара Иванова белән мәгариф министры Айбулат Хажинга фильмны җитештерүчеләргә чыгып, бөтен мәктәп укучыларына да күрсәтү турында сөйләшергә кушты. “Бу фильм безнең республика турында. Күптән безнең республика турында шулай матур күрсәткәннәре, матур сөйләгәннәре юк иде. Безнең тарихка, табигатькә, кешеләргә карата шулкадәр зур мәхәббәт тасвирлана. Моны барсына да күрсәтергә кирәк”, - диде ул.