Благоварда да коронавирус йоктыручылар арткан, ди

Яңа коронавирус инфекциясе тәүдә Кытайда, аннары Европаның Италия белән Испания илләрендә, соңыннан Мәскәүдә котырганда ул Уфага килеп җитмәс төсле иде. Ә ул килеп җитте. Ул гына түгел, районнарга да таралды. “Благоварские вести” язуынча, туган районым Благоварда да таҗлы вирусны йоктыручылар бар, ди. Өченче көнне властьлар рәсми рәвештә 3 благоварлы коронавирус йоктырган дип хәбәр итсә, кичә инде бу вирус барлыгы 4 кешедә теркәлгән. Алар барысы да Уфаның йогышлы авырулар хастаханәләрендә дәвалана.

Башкортстанда соңгы тәүлектә коронавирус йоктыручылар саны 22 кешегә артып 213кә җиткән.

Рәсми мәгълүматларга ярашлы, 17 апрельгә төбәктә COVID-19дан 8 кеше үлгән, 14е — савыккан.

Русиядә соңгы тәүлек мәгълүматларына ярашлы, 4070 яңа коронавирус йоктыручы ачыкланган. Авыруларның гомум саны 32 008 кешегә җиткән. 2 509 пациент терелгән, ә инде 273 кеше бакыйлыкка күчкән.