Тәгәрмәч шартлап, механизатор үлгән...

Башкортстанның Илеш районында “Урожай”  токымчылык заводының 56 яшьлек хезмәткәре һәлак булган. Бу хакта республиканың Дәүләт хезмәт инспекциясе хәбәр итә.

Фаҗига 2 июльдә авыл хуҗалыгы предприятиесенең Иске Күктау авылындагы машина-трактор остаханәсе территориясендә була.

Демонтаж вакытында мал азыгы тарату техникасының тәгәрмәче шартлый. Тәгәрмәчнең дискы механизаторның башына килеп бәрелә. Алынган җәрәхәттән ир-ат шул урында вафат була.

“Тикшерү барышында хәлнең сәбәпләре ачыкланачак”, – диләр хезмәт инспекциясе вәкилләре.