Республикада дуңгыз гриппы йөри башлаган

Грипп чорына кердек. Аның вируслары Башкортстан территориясендә тарала башлаган.

Роспотребнадзорның Башкортстан буенча идарәсеннән хәбәр итүләренчә, ковид һәм риновируслар белән беррәттән грипп вирусы да барлыкка килгән. Аның А (H1N1) тибы ныграк таралуы теркәлгән, аны икенче төрле “дуңгыз гриппы” дип тә атыйлар.

“Соңгы атнада республикада кискен респиратор инфекцияләрнең 24,6 мең очрагы теркәлгән. Аларның 48,6 проценты балаларга туры килә”, – диләр ведомствода.

Кискен респиратор инфекцияләр йоктыру хәвефен киметергә гади профилактик чаралар ярдәм итә. Алар – җәмәгать урыннарында битлек куллану, кулларны сабын белән юу, авыру кешеләр белән элемтәгә кермәү һәм биналарны җилләтү, дип искәртә белгечләр.