Сарайда тапкан граната үсмерләр кулында шартлаган

Ингушетиядә әтисенең сараенда табылган граната шартлагач, тугызынчы сыйныфта укучы ике үсмер авыр хәлдә дәваханәгә эләккән. Малайлар очраклы рәвештә яшерелгән корал тапкан.

Бу хәл Малгобек районының  Югары Ачалуки авылында теркәлгән. 14 яшьлек үсмер үзенә кунакка яшьтәшен чакырган. Үсмерләр ихатада уйнаган вакытта сугыш кирәк-яракларына тап булган. Алар арасында берничә граната да булган. Үсмерләр бер Ф-1 гранатасын җентекләп карган вакытта ул шартлаган.

Авыр хәлдәге үсмерләрне дәваханәгә алып киткәннәр: берсенең муенында кан тамырлары зарарланган ярчыклы җәрәхәтләр, икенчесенең күкрәгенә һәм корсагына үтеп керүче яралар теркәлгән.

Полиция хезмәткәрләре вакыйга урынында тагын ике Ф-1 гранатасы, Калашников автоматы өчен өч магазин, төтен шашкасы, ике дистәгә якын патрон һәм ВОГ-17 гранатомет атуы табалар. Хокук сакчылары бу складны кем оештырганын һәм йорт хуҗасының аңа нинди мөнәсәбәте барлыгын ачыклыйлар. Җинаять эше кузгату мәсьәләсе карала. 

Чыганак: SHOT Telegram-каналы.