Сәнәкләр белән һөҗүм итмәкче булганнар

Уфада пычак, сәнәк һәм көрәкләр белән коралланган кешеләр бер хатынга һөҗүм итмәкче булганнар. 6 август көнне полициягә Зоя Космодемьянская урамында яшәүче җирле хатынга бер төркем ир-атлар килеп, аны көч куллану белән куркытулары турында хәбәр килде. “Алынган хәбәр буенча полиция хезмәткәрләре вакыйга урынына юлланды. Хокук саклау органнары хезмәткәрләре бу урынга килеп җиткәч, бер-берсенә агрессив, котырынган кешеләрне күргән", - дип хәбәр иттеләр Эчке эшләр министрлыгының матбугат хезмәтендә. Полиция хезмәткәрләре җәнҗал оештыручыларны 9нчы полиция бүлегенә алып киткән. Җәнҗалчыларга каршы "кече хулиганлык" маддәсе буенча протоколлар төзелгән.