Балалар бакчасында сифилис таралган

Чиләбедә балалар бакчасында сифилис ачыкланган. Венерик авыруны тәүдә бер хезмәткәр хатында ачыклаганнар һәм ата-аналардан моны яшерергә теләгәннәр, әмма  соңыннан, ата-аналар фикеренчә, балалар арасында да чир йоктыру очрагы ихтимал булган.

Ата-аналар сөйләвенчә, көннәрдән беркөнне алардан сәбәбен аңлатмыйча балалардан анализ алуга ризалык кәгазенә кул куюны сорганнар. Һәм балаларның берсендә чир ачыклану куркынычы барлыкка килгәч кенә, ата-аналарга актлар залында узган ашыгыч җыелышта  барысына да тиз арада антибиотиклар эчәргә киңәш иткәннәр. Нәрсәдән дәваланырга икәнен медицина хезмәткәре ахыргача әйтәсе килмәгән, әмма ата-аналар басымы астында  ул “венерик ЧП” турында хәбәр итә.

Билгеле, сифилисны җенси генә түгел, көнкүреш юлы белән дә  йоктырырга мөмкин – балалар чирне авыру өлкәннәр белән тыгыз элемтә нәтиҗәсендә йоктыра ала. Ата-аналар сүзләренчә, чир йоктыручылар күбрәк булырга  да мөмкин – әле балалар бакчасының хезмәткәрләре һәм тәрбияләнүчеләрен медиклар тикшерә. Балалар бакчасындагы хәлне Русия Тикшерү комитеты рәисе Александр Бастрыкин үз контроленә алган.

Эмоцияләр шулкадәр кайный ки, ни әйтергә дә белмәссең... 

Чыганак: SHOT Telegram-каналы.