Начар юллар һәлакәткә илтә

Яз җитсә, Рәсәйдә бер проблема: юллар.  Кыш көне чокыр-чакырлар алай сизелми үзе, кар аларны үзе ямап тора, әмма кар эреп бетү белән тишек юллар проблемасы яңадан калкып чыга, кайбер юл участокларында чын мәхшәр башлана. Юлларның начар булуы машина йөртүчеләргә – үзе бер бәла, йөрәк ярасы. "Шартлаткыч миналар куелган басудан барабыз диярсең...", "Чокырлар аша "сикереп" йөри-йөри машинамның бер төзек җире калмады" дигән ах-зарларны шоферлардан аеруча еш ишетергә туры килә. Аңларга да була инде үзләрен: шактый зур суммага кредитлар түли-түли алган автомобилеңне һич кенә дә начар юлларда йөреп сафтан чыгарасы килми шул... Бер авыл абзыеның сүзләре искә төшә. "Эх, теш кенә булса, акчасын үзем түләп булса да яматыр идем, ташны яматырлык акчам юк шул", - дигән ди ул, совет чорында хәтәр затлы булган тимер атын жәлләп. Чит ил машиналарында җилдерүчеләр ниндирәк сүзләр белән үтә икән мондый урыннарны?

Теш ямаучылар булган кебек, юл ямаучылар да бар бит инде юкса.

Республика белән идарә итү үзәгенә килгән жалобаларның, мөрәҗәгатьләрнең күпчелеге нәрсәгә кагылышлы дип уйлыйсыз? Әлбәттә, юлларга.  Халык чокырларны ямау, күмү, килү сорап яза. Бу атнада Хөкүмәттә үткән оператив киңәшмәдә дә премьер-министр Андрей Назаров республиканың Транспорт һәм юл хуҗалыгы министрлыгына чокыр ремонтларын 30 июньгә тәмамларга күрсәтмә бирде.

• Җәйге мизгелнең яртысы инде үтеп бара, ә без һаман кар эрегәч ачылган чокыр-чакырларны ямап бетерә алмыйбыз, - диде ул. – Юл-транспорт һәлакәтләре күбәйде. Аварияләр чокырлы урыннарда, разметкалары булмаган юлларда күбрәк ясала. Быел биш айда 1238 авария теркәлгән. Аларда  14 бала һәлак булды, 498е имгәнде. Ремонт эшләрен сузабыз. Әйдәгез, шулай килешик: 30 июньгә республика әһәмиятендәге юллардагы кимчелекләрне бетерү эшләрен тәмамлыйсыз.

Республика транспорт һәм юл хуҗалыгы министры Александр Клебанов хәбәр итүенчә, бүгенге көнгә 18,15 мең чакрым юлны карап чыкканнар. Белгечләр анда 89 мең кимчелек тапкан, 71 меңен төзәткәннәр.

Чокыр-чакырларны ямау эше ел буена бара, ди ул. Шулай ук, республикада горизонталь юл разматкалары ясау эшләре дә дәвам итә. Термопластик белән эшләнүче разметкаларның гомум озынлыгы – 1,1 мең, , буяулар белән 14,6 мең чакрым тәшкил итәчәк. Әлеге вакытта буяу белән 14 машина 2,14 мең чакрым юлга разметка ясаган, бу 34 процентны тәшкил итә. Министр әфәнде эшләрне 30 июньгә кадәр тәмамлаячаклары турында әйтте.

• Бөтен районнар да эш графигын сакламый, – диде ул. – Муницпаль район һәм шәһәрләр карамагында 9 794 чакрым юл бар, шуның 8 769 чакрымын (90 процентын) тикшереп чыкканнар. “Кызыл” зонага ике шәһәр белән 17 район эләккән. Эш иң сүлпән барган районнар -  Борай белән Көергәзе. Аларда юлдагы кимчелекләрне бетерү 22 процентка гына башкарылган. Дәүләкән белән Илеш районнарында эшләр дәвам итә, Авыргазы районында чокыр-чакырларны ямау эшләре бик акрын темпта бара. Сәбәбе – бу эш өчен җаваплы булган чиновникларның эштән китүе, урыннарда эшнең оешмавы.

Ничек кенә булмасын, юллар тәртиптә булырга тиеш. Яхшы юллар – хәвефсезлек билгесе.