Зур янгынны бергәләп сүндерделәр

Башкортстанның Гадәттән тыш хәлләр буенча дәүләт комитеты рәисе урынбасары Лилия Кәримова төбәктәге янгыннар буенча оператив мәгълүмлар китерде. Аның әйтүенчә, Калтасы һәм Краснокама районнары чигендә Куян авылы янында чыккан зур янгын сүндерелгән. Ут белән биш көн көрәшкәннәр.

"Янгынны сүндерү җиңел булмады, чөнки анда барып җитүе авыр, торфлы урын, - диде ул. -  Ут таралмасын өчен, җирне сөрделәр һәм су сиптеләр. Шушы эшләр белән беррәттән  коткаручылар мазутлы тапларны  бетерделәр. Янгын урынында оператив штабы булдырылды. Волонтерлар зур ярдәм күрсәтте, көн саен 200дән 450гә кадәр кеше ярдәмгә килде.  Болар - күрше авыллардан, Нефтекамадан, Дүртөйледән җирле халык. Алар урман хуҗалыгы министрлыгы хезмәткәрләре, янгын сүндерүчеләр белән бу эштә актив катнаштылар. Иң проблемалы көннәрдә янгынны сүндерүгә  КА-32 вертолеты җәлеп ителде".

Чыганак: Башинформ.