Бу юлда 20 кеше үлгән...

Юл хәрәкәте хәвефсезлеге дәүләт инспекциясенең Башкортстан буенча җитәкчесе Владимир Севастьянов 2022 елда республикада кайсы трассада аварияләрдә иң күп кеше үлгәнлеген әйтте.

Узган ел иң күп корбаннар Уфа-Бөре-Яңавыл юлында булган: анда юл һәлакәтләрендә 20 кеше үлгән.

Шулай ук Уфа-Чишмә-Миякә трассасында да үлем очраклары югары булып кала. Былтыр бу юлда 13 кешенең гомере өзелгән. Бөре-Тастүбә-Сатка юлында исә 12 кеше үлгән...

Владимир Севастьянов телеграм-каналында язуынча, узган ел Башкортстанда 3 меңнән күбрәк юл-транспорт һәлакәте теркәлгән. Аларда барлыгы 409 кешенең гомере өзелгән, аларның 14 – балалар... 4 меңнән күбрәк кеше тән җәрәхәтләре алган.

Гомумән алганда, республикада аварияләрнең гомум саны – 11 процентка, үлем очраклары – 15 процентка, зыян күрүчеләр саны 11,1 процентка азайган, ди Баш инспектор.

Юлларда ашыкмый, исән-имин йөрик.