Туэйтс - кешелеккә куркыныч белән яный

Галимнәр фаразлавынча, Көнбатыш Антарктидада урнашкан Туэйтс бозлыгы якын киләчәктә тотрыклылыгын югалтырга һәм 5 ел эчендә җимерелергә мөмкин. Кыямәт көн бозлыгы тулысынча җимерелгән очракта, диңгезнең глобаль дәрәҗәсенең 0,6 метрга кадәр күтәрелүенә китерүе ихтимал. Бу зур хәвеф тудыра.
Мәгълүматларга ярашлы, бозлыкның шельф өлеше елына 2 километрга кадәр тизлектә ярыла. Әгәр ярыклар бозлыкның диңгез төбендәге нигезендә пәйда булган ярыклар белән кисешсә, бозлыкның нибары 5 ел эчендә җимерелүе мөмкин.
Галимнәр, Антарктиданың тиз хәрәкәтләнүче һәм тотрыксыз бозлыгы булуы сәбәпле, Туэйтсны Кыямәт көн бозлыгы дип атаганнар. Бу бозлык бүгенге көннән үк диңгезне 4 процентка күтәрүгә үз "өлешен" салган. Глобаль җылыту аркасында Антарктиданы юучы суларның температурасы күтәрелүе бозлыкның Көньяк океанга тулысынча җимерелеп төшүеннән тыш, башка күп бозлыкларга да тотрыксызлык китерүе мөмкин дигән фикердә галимнәр.

Фото: sciencenews.org