Ата кеше 5 айлык баласын балконнан атып бәрә язган

Бу хәл 19 август көнне Саранск шәһәрендә була. Бер исерек ир күпкатлы йортның балконыннан 5 айлык баласын ташламакчы булган. Курчак сыман аягыннан гына эләктереп, нидер кычкыра-кычкыра аска болгый башлаган. Халык җыелган. Коткаручылар килеп җиткәнче һәркем ирне үзенчә тынычландырырга тырышкан. Аның янына бары тик күрше балконның тар рәшәткәләре буйлап кына үтәргә мөмкин булган. Полиция хезмәткәрләре һәм коткаручылар, үзләренең гомерләрен куркыныч астына куеп, шуннан кергәннәр һәм 5 айлык баланы үлемнән коткарганнар. Җирдә балкон турысына батут куеп, коткаручылар сакта торган, ашыгыч ярдәм машинасы да килгән. Бу вакытта баланың әнисе дә урамда халык янында торган, куркыныч хәлгә түзә алмыйча, һушыннан язып егылган.

Үз гомерен аямыйча, кеше йөри алмаслык тар кәрниздән килеп, ирне эчке якка этеп җибәргән кеше - урындагы участковый, полиция лейтенанты Василий Мартынов. Социаль челтәрләрдә аның бу батырлыгы өчен халык бик күп уңай комментарийлар язып калдырганнар: "Афәрин, Василий! Син чын ир-егет!", " Синең кебек кыю кешеләр бик аз, сокланам! Ышанам, бу юлларны син дә укыйсыңдыр, рәхмәт сиңа", "Шәп егет син, үзеңә дә яхшылык булып кайтсын, афәрин!" һ.б.

Бу мәхшәргә кадәр, теге исерек ир өйдә буран уйнатып, хатынын өйдән куып чыгарган булган. Шуннан тәрәзәдән әйберләрен атып бәрә башлаган. Бер-бер артлы утыргычлар җиргә очкан, утюг, микроволновка, табалар килеп төшкән. Ә аннан... үз баласын аягыннан тотып, аны да атып бәрмәкче булган... Видеосын карагыз сылтама аша кереп: https://www.1tv.ru/news/2019-08-20/370746-v_saranske_pyanyy_muzhchina_pytalsya_vybrosit_iz_okna_rebe...

Әйткәндәй, моңа охшаш хәл яңарак Уфада да булган иде, Сипайлово бистәсендә бер ир балконнан ташланырга уйлаган. Коткаручылар килгәнче хатыны аның джинс чалбарыннан тотып торган. Сылтама: https://omet-rb.rbsmi.ru/articles/kh-vef-kh-t-r/sigezenche-kattan-sikererg-uylaganmy/

#ләйсәнкаспранова