Бензинга чиратта тору аркасында килгән штрафлар гамәлдән чыгарылачак

Заправкада бензин салырга чиратта торганда, тукталыш һәм машина кую урыннары кагыйдәләрен бозган өчен салынган штрафлар гамәлдән чыгарылачак. Бу хакта Русия Эчке эшләр министрлыгының рәсми вәкиле Ирина Волк белдергән икән.

«Мондый һәр очрак буенча Русия Эчке эшләр министрлыгы Дәүләт автоинспекциясенең барлык төбәк бүлекчәләрендә махсус карарлар кабул ителәчәк. Кагыйдә бозуның әһәмияте зур булмау яки шоферның чарасызлыктан шулай эшләргә мәҗбүр булуын исәпкә алып, мондый штрафларны гамәлдән чыгарачаклар», – дип язган ул социаль челтәрләрдә.

Штрафларны гамәлдән чыгару законда билгеләнгән тәртиптә була – прокурор тарафыннан шикаять яки протест аша башкарылачак.

Фото: «Башинформ».