"Без көллиятләрне ябудан ерак торабыз"

Башкортстан Башлыгы белән туры юлга Башкортстан архитектура - төзелеш көллиятенең Благовещенск филиалының киләчәк язмышы турындагы сорау бирделәр. Радий Хәбиров көллиятне ябу турында сүз дә юк, дип ышандырды:

- Без көллиятләрне ябудан бик ерак торабыз. Минемчә, Башкортстанда урта һөнәри белем бирүнең иң эре челтәрен саклап калып булды. Бездә алар күп-92 көллият. Алар һәр район үзәгендә диярлек бар һәм алар барысы да төрле хәлдә. Кайдадыр алар совет СПТУ дәрәҗәсендә коточкыч хәлдә , ә кайберләре инде республиканың урта һөнәри белем флагманнары булып тора.

Благовещен көллиятен без ябарга җыенмыйбыз. Шәһәрдә барлыгы өч көллият бар һәм без хәзер аларны оптимальләштерәбез — бер зур уку комплексына әйләндерәбез. Көллият Благовещен күппрофильле көллияте белән тоташтырылачак, һәм мондый әйберләрне без берничә шәһәрдә планлаштырабыз. Бу безгә көчләрне тупларга, шулай ук артык административ чыгымнарны оптимальләштерергә мөмкинлек бирә. Кабатлап әйтәм, мәгариф учреждениесен без япмаячакбыз, колледжлар — безнең сәнәгать һәм авыл хуҗалыгы предприятиеләренең төп партнеры.