Кайтырга дип киттеләр

Уфа шәһәренең "Уфа-арена" Боз сарае янында махсус хәрби операциядән кыска вакытлы ялга кайтучыларны яу яланына озаттылар. Аларны озатырга туганнары, якыннары һәм Башкортстан Республикасы Хөкүмәте вәкилләре килгән иде.
Яугирләр А.Достовалов исемендәге мотоукчылар батальонында һәм “Башкортостан” мотоукчылар полкында хезмәт итәләр.

Башкортстан батальоннары составында башка төбәкләрдән дә контракт төзеп хезмәт итүчеләр бар. Яугирләр әйтүенчә, аларга Башкортстан подразделениеләренә эләгү үзе бер мәртәбә, чөнки безнең республика Русиядә иң яхшылары исәбендә. Шундыйларның берсе – Томск шәһәреннән килгән “Музыкант” позывнойлы яугир – күп бала әтисе.

• Махсус хәрби операция барган урынга хезмәт итәргә минем йөрәгем кушты, - ди ул. – Балаларың өчен үрнәк булырга тиешсең, аларга яхшы тәрбия булсын дип барам. Бармасам – оят булыр иде. Әлеге вакытта операция башка дәрәҗәдә бара. Заманча корал, техника, дроннар таләп ителә.

“Банкир” позывнойлы яугир Башкортстан батальоннары матди яктан йөз процентка тәэмин ителгән, ди. “Без үзебезгә күрсәтелгән ярдәмне тоеп торабыз, ул безгә дәрт бирә”, - ди ул.

БР Хөкүмәте Премьер-министры урынбасары Ирек Сәгыйтов аларны яуга озатып, җылы сүзләрен җиткерде.

• Без сезнең исән-сау Җиңү белән әйләнеп кайтуыгызны көтәбез! - диде ул. – Радий Фәрит улы исеменнән һәм минем үземнең шәхсән хөрмәтләремне җиткерәм сезгә, хөрмәтле офицерлар, сержантлар, прапорщиклар, кадерле якташлар, туганнар һәм яугирләребезнең якыннары! Сез бүген яңадан Ватаныбызны сакларга юл аласыз. Без – Төньяк Амур, Салават Юлаев, генерал Шәйморатов токымнары! Без – Бөек Ватан сугышы Геройларының оныклары. Безнең ата-бабаларыбыз 80 ел элек шушы ук территорияләрне фашизмнан азат иткән. Бөтен республика сезнең белән горурлана! Өйләрегезгә исән-сау, Җиңү белән әйләнеп кайтыгыз!

Башкортстаннан шушы көннәрдә Донбасска 114 нче гуманитар ярдәм озатыла.
Яугирләрне озатырга "Караван-сарай" төркеме лидерлары да килгән иде. Алар егетләрне дәртле җырлары белән рухландырдылар.
Алар кайтырга дип китә. Без сезне сагынып, өзелеп көтәрбез!